غزل

(از مرتضی  سید)

جو بات دل میں ہو وہی اپنی زباں پہ ہو

سر چاہے اپنا رفعت نوک سناں پہ ہو

 امید کیا ہو اس کو ثبات و دوام کی

 تحریر جس کا نام کہ آب رواں پہ ہو

 برداشت کیا کرے گا حقائق کے زلزلے

 جس قصر کی اساس ہی وہم و گمان پہ ہو

ہم جس کی جستجو میں فلک در فلک اڑے

وہ ماہتاب جانئے  کس کہکشاں پہ ہو

اتنے ہی زور و و شور سے آتا ہے انقلاب 

جور و جفا کی جتنی بھی شدت جہاں پہ ہو

کچھ ایسے خوف و کرب میں کاٹی ہے زندگی

جیسے مرا مکاں کسی آتش فشاں پہ ہو 

شرمائے جس کو دیکھ کے رنگینی بہار

اتنا بھی رنگ و روپ نہ روئے خزاں پہ ہو

 سید تمہیں بھی ہوتی ہے اس چیز کی طلب

 جو سارے شہر میں نہ کسی بھی دکاں پہ ہو

By Murtaza Sayyed

THE KAGHAN (Literary Organ)

Government Post Graduate College Abbottabad 1995